Պետգնումների էլեկտրոնային համակարգից տեղեկանում ենք՝ Տավուշի մարզպետի աշխատակազմն օրերս հրատապ մեկ անձ գնման ընթացակարգով պայմանագիր է կնքել «Վեհ Իշխանասար» ընկերության հետ։ Ի դեպ, այս տարում այս ընկերության հետ մարզպետի աշխատակազմը կնքել է տասնյակ-միլիոնավոր դրամների 3 պայմանագիր, որոնցից 2-ը՝ հրատապ մեկ անձից ընթացակարգով, 1-ը՝ բաց մրցույթով։
Վերջին՝ դեկտեմբերի 10-ին կնքված պայմանագրի գինը 70 միլիոն դրամ է․ այս գումարով ընկերությունը կհոգա Տավուշի մարզի Աղստև գետի մաքրությունը։ Ժամկետ է նշված տարեվերջը։
Մի քանի ամիս առաջ էլ նույն ընկերությունը դարձյալ հրատապության ռեժիմով մարզում իրականացրել է կամուրջների կառուցման աշխատանքներ․ մարզպետի աշխատակազմի հետ կնքված պայմանագրի գինն այդ աշխատանքների համար կազմել էր շուրջ 40 միլիոն դրամ։
Իրավաբանական անձանց ռեգիստրի տվյալներով ընկերությունը ստեղծվել է 2006 թվականին և գրանցված է Սյունիքի մարզի Սիսիան համայնքում, ընկերության 100 տոկոս բաժնեմասը 2009 թվականից պատկանում է Մագդա Ավագյանին, իսկ տնօրենի պարտականությունները կատարում է նրա որդին՝ Կարեն Աֆոյանը։ Վերջինս, ի դեպ, 2018 թվականի դեկտեմբերից տնօրինում է «Վառմաշ» ընկերության 100 տոկոս բաժնեմասը։
2006 թվականին ստեղծված «Վեհ իշխանասար» ընկերությունը միայն 2020 թվականից է հայտնվել պետգնումներում․ հիմնական պատվիրատուներն են Տարածքային կառավարման և ենթակառուցվածների նախարարությունն ու Տավուշի մարզպետի աշխատակազմը, որոնց հետ ընկերությունը, ըստ պետգնումների էլեկտրոնային համակարգում առկա տվյալների, կնքել է շուրջ 10 պայմանագիր։
Դեռ նոյեմբերին հայտնի էր դարձել, որ կառավարությունը վերաբաշխում է կատարել պետբյուջեում և փոփոխություններ ու լրացումներ նախկինում ընդունած որոշման մեջ՝ հեղեղների հետևանքով առաջացած իրավիճակը բարելավելու և հետագա հնարավոր վտանգները նվազեցնելու նպատակով: Ըստ այդմ՝ առաջարկվում է կազմակերպել և իրականացնել հակահեղեղային անհետաձգելի միջոցառումներ, որոնք միտված կլինեն գետերի հուները աղբից, քարերից, հուների մեջ աճած ծառերից մաքրմանը, գետերի հուների էկոհամակարգի վերականգնմանը։
Հիմնավորման համաձայն՝ հեղեղումներից հետո գետերի հուների մաքրմանն ուղղված միջոցառումների իրականացումը գնահատվել է անհետաձգելի և հրատապ, հաշվի առնելով նաև օդերևութաբանական կանխատեսումներն աշնան, ձմռան և գարնան ամիսներին սպասվելիք առատ տեղումների և նորմայից ցածր ջերմաստիճանի վերաբերյալ, որոնք անխուսափելիորեն կհանգեցնեն նոր հեղեղումների և ավելի մեծ վնասների․ «Հուլիսի 27-ին հորդառատ անձրևների հետևանքով Տավուշի մարզի Դիլիջան համայնքի Հաղարծին բնակավայրում Աղստև գետը ողողել էր աջ լանջի մոտ 150 մ հողազանգվածը և Մ-4 միջպետական ավտոճանապարհի հարակից ափապաշտպան մոտ 30 մ երկարությամբ և 1 մ լայնությամբ հողազանգվածը: Իրականացված ուսումնասիրությունների արդյունքում պարզվել է, որ իրավիճակի շարունակական զարգացումը կհանգեցնի սողանքային մարմնի ակտիվացմանը, ինչի հետևանքով կփակվի գետի հունը, հոսքաջրերը լցվելով հարակից շինությունների և դպրոցի տարածքները՝ վնասելով Մ-4 ավտոճանապարհը։
Նկարագրված իրավիճակից խուսափելու նպատակով՝ անհրաժեշտություն է առաջացել նշված հատվածում իրականացնել հետևյալ հակահեղեղային հրատապ կանխարգելիչ միջոցառումները` մաքրել սողանքային մարմնից պոկված, գետի հունը փոխած հողազանգվածը, ինչը կլայնացնի գետի հունը և կվերադարձնի գետը նախկին հուն։ Այն կնպաստի նաև գետի թողունակության մեծացմանը, ինչն էլ կնվազեցնի այդ հատվածում ջրհեղեղով պայմանավորված ռիսկերը: Որոշմամբ 150 մլն դրամ կհատկացվի Լոռու մարզին, 70 մլն դրամ՝ Տավուշի մարզին»:
Աղբյուրը՝ 168.am
