Ադրբեջանի իշխանությունների անմիջական հովանավորությամբ գործող «Արևմտյան Ադրբեջան» համայնքն այսօր Բաքվում կազմակերպել է հակահայկական հերթական համաժողովը, որին մասնակցում են Ադրբեջանում հավատարմագրված ավելի քան 25 դիվանագիտական ներկայացուցչություններ, 100-ից ավելի ներկայացուցիչներ տարբեր երկրներից, այդ թվում՝ Թուրքիայից, ԱՄՆ-ից, Մեծ Բրիտանիայից, Գերմանիայից, Իտալիայից, Բելգիայից, Ֆրանսիայից։ Հյուրերի թվում է Թուրքիայի ԱԳ նախկին նախարար Մևլյութ Չավուշօղլուն։
Համաժողովի ընթացքում ռազմատենչ և տարածքային պահանջներ ներկայացնող հայտարարությամբ ելույթ է ունեցել նախագահ Իլհամ Ալիևը՝ Հայաստանի Հանապետության ինքնիշխան տարածքը կրկին անվանելով «Արևմտյան Ադրբեջան»։ Իր խոսքում Ալիևը նշել է, թե «Հայաստանում ապրող ադրբեջանցիները ենթարկվել են էթնիկ զտումների և աստիճանաբար բռնի կերպով վտարվել են իրենց պատմական հայրենիքից», և որ «Արևմտյան Ադրբեջան» համայնքի գործունեությունը միայն ենթադրում է «ապահովել տեղահանված ադրբեջանցիների վերադարձն իրենց պապենական հողերը՝ խաղաղ և ապահով պայմաններում»։
Ըստ Ադրբեջանի նախագահի՝ Հայաստանի տարածքում ադրբեջանական պատմամշակութային հուշարձաններից պահպանվել է միայն Կապույտ մզկիթը, որի նախնական պատմաճարտարապետական ոճը, իբրև թե, Հայաստանը միտումնավոր փոխել է։ Ադրբեջանի նախագահը հավանաբար նկատի ունի հայկական կողմի փաստարկված հոդվածները, որոնք ապացուցում իրանական լինելը։
«Գեղարդ» հիմնադրամն օրերս անդրադարձել էր նաև «Արևմտյան Ադրբեջան» մտացածին նարատիվին՝ ներկայացնելով, որ Հայաստանի Հանրապետության ինքնիշխան տարածքն Ադրբեջանի կողմից «պատմական հայրենիք» անվանելը, իսկ երկրի վարչատարածքային միավորներին կեղծ անվանումներ տալն, ակնհայտորեն, որևէ աղերս չունեն պատմական իրականության հետ, և ոչ այլ ինչ են, քան տարածքային ամբողջականության սպառնալիք։
«Գեղարդ» հիմնադրամ
