«Զինված ուժերի կերպափոխման հայեցակարգ է ընդունվել, որը սահմանում է մինչև 2027 թվականը պարտադիր զինվորական ժամկետային ծառայության ժամկետները կրճատել»,- ԱԺ-ում լրագրողների հետ զրույցում ասաց «Պատիվ ունեմ» խմբակցության պատգամավոր Տիգրան Աբրահամյանը։ Ըստ նրա, այստեղ, որպես ճանապարհ նշվում է արհեստավարժ բանակի ձևավորումը և կառավարության ծրագրում դրված այն մոտեցումները, որոնք, իբրև թե մինչև 2027 թվականը բերեն ու հասցնեն այն կետին, որը մեզ հնարավորություն կտա բանակի անձնակազմն, ըստ էության, կրճատելու։
«Այն ծրագրերը, որոնց հղում է արվում և որոնք կառավարությունը ներկայացնում է այս իրավիճակում փոփոխություն մտցնելու հնարավորություն, կարող եմ ասել, որ միանշանակ՝ մինչև 2027 թվականը ոչ միայն դրանք այդ խնդիրը չեն լուծելու՝ ստեղծելու այնպիսի հնարավորություն, որի պայմաններում կարելի է պարտադիր ժամկետային ծառայության ժամկետները կրճատել, այլ դրանք չեն լուծելու այն մեր հիմնական խոցելիությունը, որն այսօր առկա է ԶՈՒ համալրման հետ կապված հարցերում։Այսինքն, մենք նույնիսկ համալրման այսօրվա մակարդակը չենք հասցրել այնպիսի կետի, որը հնարավորություն տա մեզ նույնիսկ տեսական դաշտում, 3,4,5 տարի հետոյի համար քննարկելու պարտադիր ժամկետային ծառայության ժամկետների կարճատման հարցը։ Այս տեսանկյունից, կարծում եմ, իշխանությունն ունի երկու նպատակ։ Նախ՝ միգուցե սա ադրբեջանական նախապայմանի կատարում է՝ ցույց տալու համար, որ ապառազմականացումը, որը ենթադրում է նաև անձնակազմի կրճատում, Հայաստանի իշխանությունը նախատեսել է մինչև 2027 թվականը։
Երկրորդ, 2021 թվականի նախընտրական փուլում Փաշինյանը, նրա թիմակիցներն օգտագործում էին այն հանգամանքը, որ պարտադիր ժամկետային ծառայության ժամկետն անհրաժեշտ է կրճատել։Սա, բնականաբար, ուներ հստակ նախընտրական նկարագիր, արտահայտված է նաև այսօրվա ծրագրում, որը չեմ բացառում, այս դեպքում, վստահ եմ, շահարկվելու է նախընտրական փուլում, փորձ է կատարվելու այն օգտագործել մարդկանց ընտրական վարքագծի վրա փոփոխություն մտցնելու միջոց»,- ասա Տ. Աբրահամյանը։
Նա հիշեցրեց Նիկոլ Փաշինյանի՝ երեկ ԱԺ-ում արած հայտարարությունը, որ դեռևս փնտրտուքի մեջ է, չի հասկանում մեկ, երկու, երեք բանակների դեմ պետք է աշխատել կամ առհասարակ ինչ խնդիրներ պետք է լուծել։«Սրա մասին նույնիսկ չի կարող խոսել մի մարդ, ով մեկ կամ երկու տարի է զբաղեցնում այդ պաշտոնը, բայց առավել ևս, երբ որ մարդը զբաղեցնում է այդ պաշտոնը 7 տարի ու դեռևս փնտրտուքի մեջ է, թե որն է մեր խնդիրը պաշտպանության, անվտանգության հարցում, ցույց է տալիս այն էությունը, բովանդակությունը, դրա բացակայությունը, որը կա այս իշխանությունում կամ կառավարությունում։
Այսինքն, այս կառավարության ներկայացրած որևէ քաղաքական գիծ, ծրագիր այս տեսանկյունից որևէ ձևով նույնիսկ քննարկման ենթակա էլ չէ, նույնիսկ այն ծրագրերը, որոնք կարող են երկարաժամկետ կտրվածքով իրենց մեջ որոշակի դրական էլեմենտներ պարունակել, այս համակարգային բարդակի մեջ իրենց նպատակին թիրախին որևէ ձևով չեն հասնում»,- ասաց «Պատիվ ունեմ» խմբակցության պատգամավոր Տիգրան Աբրահամյանը։
