Թունիսն անհրաժեշտ է համարում, որ նոյեմբերի 27-ին ուժի մեջ մտած հրադադարի համաձայնագիրը Լիբանանում ճանապարհ կհարթի պաղեստինյան ժողովրդին ոչնչացնող պատերազմի ավարտի համար։ Այս մասին ասվում է Հանրապետության արտաքին գործերի նախարարության ֆեյսբուքյան էջում հրապարակված հայտարարության մեջ:
«Թունիսը շեշտում է այս համաձայնագրի անհրաժեշտությունը՝ ճանապարհ հարթելու օկուպացված Պաղեստինում պաղեստինցի ժողովրդին բնաջնջող պատերազմում արյունահեղությանը վերջ տալու համար և կոչ է անում միջազգային հանրությանը ստանձնել քաղաքական, իրավական և բարոյական պատասխանատվությունը և վերջ դնել շարունակվող ապօրինություններին և բռնազավթողի դաժան հանցագործություններին»,- ասվում է տեքստում։
ԱԳՆ-ն նաև հույս է հայտնել, որ Իսրայելի և «Հըզբոլլահի» միջև կնքված համաձայնագիրը քայլ կլինի «պատերազմի վերջնական և համապարփակ ավարտի ուղղությամբ և կապահովի Հարավային Լիբանանի բնակիչների անվտանգ վերադարձը իրենց տներ»։
Հայտարարության մեջ ընդգծվում է, որ Թունիսը «կոշտ և անվերապահորեն աջակցում է Պաղեստինի ժողովրդին իր օրինական, անօտարելի իրավունքների վերականգնման հարցում, որոնք վաղեմության ժամկետ չունեն, և գլխավորը նրա ինքնորոշման իրավունքն է և անկախ, ինքնիշխան պետության ստեղծումը Պաղեստինի ողջ տարածքում՝ Արևելյան Երուսաղեմում իր մայրաքաղաքով»։
Նոյեմբերի 27-ին ուժի մեջ է մտել Իսրայելի և Լիբանանի միջև առաջին զինադադարի մասին համաձայնագիրը։
