Վրաստանի նախագահ Սալոմե Զուրաբիշվիլին հայտարարել է, որ իշխող «Վրացական երազանք» կուսակցության որոշումը՝ դադարեցնելու Եվրամիությանն անդամակցության շուրջ բանակցությունները, «վերջ է տվել մի քանի ամիս առաջ գործող իշխանությունների կողմից սկսված սահմանադրական հեղաշրջմանը»։
«Այսօր ես հանդիպեցի Եվրամիության երկրների դեսպաններին և ասացի նրանց, որ ներկայիս ղեկավարությունը վերջնականապես հեռացել է Եվրոպայից և շարժվել դեպի Ռուսաստան։ Ես խնդրեցի դեսպաններին անել ամեն ինչ՝ Վրաստանում նոր ընտրություններ անցկացնելու համար»,- հինգշաբթի օրը կայացած ճեպազրույցում ասել է Զուրաբիշվիլին։
Նրա խոսքով, ինքը հանդիպել է նաև ընդդիմադիր կուսակցությունների առաջնորդների հետ և նրանց կոչ արել միասնության «եվրոպական արժեքների համար պայքարում»։
«Այսօր ես նախագահն եմ՝ ներկայացնում եմ միակ օրինական կառույցն այս երկրում, որը հնարավորություն ունի խոսելու համաշխարհային առաջնորդների հետ, ես նրանց կփոխանցեմ վրաց ժողովրդի կամքը»,- ասել է Զուրաբիշվիլին։
Վարչապետ Իրակլի Կոբախիձեն հինգշաբթի ավելի վաղ ասել էր, որ Վրաստանը չի բարձրացնի Եվրամիությանն անդամակցելու շուրջ բանակցությունների բացման հարցը մինչև 2028 թվականը, և երկիրը նույնպես հրաժարվում է ԵՄ-ից այս ժամանակահատվածի բյուջետային որևէ դրամաշնորհից։
