Ուկրաինայի նախագահական գրասենյակի ղեկավար Անդրեյ Երմակը հայտարարել է, որ Ռուսաստանի հետ բանակցություններ սկսելու համար Մոսկվան պետք է վերադառնա մինչև 2022 թ փետրվարի 23-ը զբաղեցրած դիրքեր։ Այս մասին Երմակն ասել է իտալական Corriere della Sera հրատարակությանը տված հարցազրույցում։ Երմակը նշում է, որ նախագահ Վլադիմիր Զելենսկին «երբեք չի խոսել տարածքային փոխզիջման մասին», այլ պահանջում է միջազգայնորեն ճանաչված սահմանների ընդունում։
Նաև ասել է, որ Ղրիմի և Դոնբասի ուկրաինական կարգավիճակը «բանակցության ենթակա չէ», չնայած դեռ 2022 թվականին Զելենսկին խոսել էր բանակցելու իր պատրաստակամության մասին։
«Սակայն բանակցություններ սկսելու համար մենք պետք է վերադառնանք այն իրավիճակին, որը կար մինչև փետրվարի 23-ը։ Այնուհետև մենք կխոսենք այն մասին, թե ինչպես վերականգնել մեր ինքնիշխանությունը 1991 թվականի սահմաններով: Մենք չենք կարող խաղաղության առաջարկ կառուցել՝ թույլ տալով մեզ ենթարկվել նրանց ազդեցությանը, ովքեր ցանկանում էին այս պատերազմը: Մենք պատրաստ կլինենք միջազգային համաժողով անցկացնել, երբ զգանք գլոբալ հարավի ուժն ու աջակցությունը Ռուսաստանի հետ բանակցությունների համար»,- ասում է Ուկրաինայի նախագահի աշխատակազմի ղեկավարը։
