Վրաստանի Կենտրոնական ընտրական հանձնաժողովի (ԿԸՀ) շենքի դիմաց բողոքի ակցիա է սկսվել, որը նոյեմբերի 16-ին պետք է ընդունի հոկտեմբերին կայանալիք խորհրդարանական ընտրությունների ամփոփիչ արձանագրությունը։ Այս մասին հայտնումեն վրացական ԶԼՄ-ները։
Ըստ հրապարակումների՝ Թբիլիսիում ցույցի են եկել ընդդիմության ներկայացուցիչներ և ակտիվիստներ, սակայն, մարդիկ չեն կարողացել մոտենալ կառավարական գերատեսչության շենքին, քանի որ դրա տարածքը շրջափակված է ցանկապատով։
Նշվում է, որ այժմ դեպքի վայրում են տասնյակ իրավապահներ։ Միաժամանակ, մի քանի ոստիկանական մեքենաներ փակել են Վրաստանի Կենտրոնական ընտրական հանձնաժողովի տարածքի մուտքը։
Այն բանից հետո, երբ ընտրական հանձնաժողովը կընդունի վերջնական ընտրական արձանագրությունը, նոր խորհրդարանը կկարողանա սկսել աշխատանքը։ Դա տեղի կունենա 10 օրվա ընթացքում։
Վրաստանի բարձրագույն օրենսդիր մարմնի ընտրությունները տեղի են ունեցել հոկտեմբերի 26-ին։ Քվեարկության արդյունքներով՝ հաղթել է իշխող «Վրացական երազանք» կուսակցությունը՝ հավաքելով ձայների 54,3 տոկոսը, սակայն մի շարք ընդդիմադիր քաղաքական միավորումներ չեն ընդունել ընտրությունների արդյունքները, իսկ «Հանուն փոփոխությունների» կոալիցիայի անդամները նույնիսկ հրաժարվել են իրենց պատգամավորական մանդատներից:
Ավելին, հանրապետության նախագահ Սալոմե Զուրաբիշվիլին չի համաձայնել քվեարկության արդյունքների հետ։ Նա քաղաքացիներին կոչ է արել բողոքի ակցիաներ կազմակերպել նոր խորհրդարանի աշխատանքի մեկնարկի դեմ։
