ԱՄՆ նորընտիր նախագահ Դոնալդ Թրամփը նոր վարչակազմում ազգային անվտանգության հարցերով խորհրդականի պաշտոնում առաջադրել է հանրապետական Մայք Ուոլցի թեկնածությունը, որը Ներկայացուցիչների պալատի անդամ է, իսկ Ֆլորիդայից սենատոր Մարկո Ռուբիոյին ցանկանում է նշանակել պետքարտուղարի պաշտոնում։ Այս մասին հայտնում է The Wall Street Journal-ը (WSJ):
Ներկայում Ազգային անվտանգության հարցերով խորհրդականի պաշտոնը զբաղեցնում է Ջեյք Սալիվանը։ Սա առանցքային պաշտոններից մեկն է, որը նշանակվում է նախագահի կողմից և չի պահանջում Սենատի հաստատում։ Այս պաշտոնում գտնվող պաշտոնյան վերահսկում է ազգային անվտանգության հարցերով զբաղվող բոլոր գերատեսչությունների աշխատանքը, նախագահին տեղեկացնում է առկա իրավիճակի մասին և իրականացնում նրա քաղաքականությունը։
50-ամյա Վալցը հատուկ նշանակության ուժերի թոշակի անցած սպա է, ով ծառայել է Աֆղանստանում, Մերձավոր Արևելքում և Աֆրիկայում, հայտնում է Financial Times-ը:
Լրագրողները նշում են, որ նա Թրամփի հավատարիմ դաշնակիցն է և ներկայիս նախագահ Ջո Բայդենի բացահայտ քննադատը։ Վալցը տարբեր պաշտոններ է զբաղեցրել Սպիտակ տանը և Պենտագոնում, իսկ Կոնգրեսում ընտրվել է 2018 թվականին։
Պետքարտուղարի պաշտոնը ներկայումս զբաղեցնում է Էնթոնի Բլինքենը։ Թրամփի թեկնածուն՝ 53-ամյա Ռուբիոն, սենատոր է 2011 թվականից։
