«Իշխանություն» լրատվականին հայտնի դարձավ, որ Արմավիրի մարզում, կիսակառույց շենքի նկուղում, անմարդկային պայմաններում հայտնաբերված 59-ամյա Հակոբ Սարգսյանը երեկ հիվանդանոցում մահացել է։
Հիշեցնենք՝ օգոստոսի 14-ին Արմավիրի մարզում գտնվող կիսակառույց շենքի նկուղում հայտնաբերվել էին Արմավիրի երկու բնակիչ։ Նրանք գտնվել էին ծայրահեղ ծանր կենցաղային պայմաններում՝ թերսնված և գերհյուծված վիճակում, ինչից հետո տեղափոխվել էին «Արմավիր» բժշկական կենտրոն։
Բուժհաստատությունում Հակոբ Սարգսյանը հետազոտվել էր։ Ըստ այդ պահին կատարված լաբորատոր հետազոտությունների՝ էական շեղումներ չէին արձանագրվել։
Ժամեր անց 59-ամյա տղամարդը հետագա բուժօգնություն ստանալու նպատակով տեղափոխվել էր Երևան։ Հետագայում նրա առողջական վիճակը կտրուկ վատացել էր։
Առողջապահության նախարարի մամուլի խոսնակ Մարիամ Ծատրյանը հաստատեց Հակոբ Սարգսյանի մահվան մասին տեղեկությունը։
«Նա վերակենդանացման բաժանմունքում բուժում ստացող հիվանդ էր և այս ամբողջ ընթացքում ստացել է անհրաժեշտ բուժօգնություն։ Առողջական բազմաթիվ խնդիրներ ուներ, խոսքը մեկ հիվանդության կամ մեկ խնդրի մասին չէր։ Երեկ բուժկենտրոնից մեզ տեղեկացրին, որ նա մահացել է»։
