ԱՄՆ նախագահ Դոնալդ Թրամփը հայտարարել է, որ ամենևին անհանգստացած չէ ՆԱՏՕ-ի անդամ երկրների վրա Ռուսաստանի հնարավոր հարձակման կանխատեսումներով՝ չնայած եվրոպական դաշնակիցների աճող մտահոգություններին:
«Ես բոլորովին մտահոգված չեմ․ որևէ խնդիր չկա»,- Axios-ի թղթակցի հետ զրույցում ասել է Թրամփը ՝ պատասխանելով դաշինքի երկրների դեմ ռուսական հնարավոր սադրանքի մասին հարցին:
Նախօրեին ԿՀՎ (CIA) ղեկավար Ջոն Ռեթքլիֆը գաղտնի այցով մեկնել էր Մոսկվա, որտեղ հանդիպում էր ունեցել Ռուսաստանի Արտաքին հետախուզության ծառայության տնօրեն Սերգեյ Նարիշկինի հետ: Մի շարք լրատվամիջոցներ հայտնել էին, որ ուղևորության նպատակներից մեկը Մոսկվային ՆԱՏՕ-ի անդամ որևէ երկրի վրա հարձակվելու անթույլատրելիության մասին զգուշացնելն էր:
Թրամփը հերքել է այս տեղեկությունը՝ նշելով, որ Ռեթքլիֆի և Նարիշկինի հանդիպումը եղել է «սովորական աշխատանքային» և որևէ արտառոց բան չի պարունակել: «Ոչ մի ուղերձ չի եղել, և արտասովոր ոչինչ չի պատահել»,- հայտարարել է ԱՄՆ նախագահը:
Ուշ, կրկին անդրադառնալով Վլադիմիր Պուտինին հնարավոր նախազգուշացման մասին լուրերին, Թրամփը խուսափել է ուղղակի մեկնաբանությունից, սակայն ընդգծել է․ «Նրանք չեն հարձակվի ՆԱՏՕ-ի տարածքի վրա»:
Նարիշկինը հինգշաբթի օրը հաստատել է Մոսկվայում Ռեթքլիֆի հետ հանդիպման փաստը՝ հայտնելով, որ բանակցությունները եղել են իրենց «աշխատանքի սովորական մասը», և կողմերը քննարկել են հետախուզական հարցեր:
Միևնույն ժամանակ, եվրոպական առաջնորդները վերջին ամիսներին բազմիցս զգուշացրել են, որ Ռուսաստանը կարող է փորձել ստուգել իր անդամներին պաշտպանելու վերաբերյալ ՆԱՏՕ-ի պատրաստակամությունը (այդ թվում՝ սահմանափակ ռազմական հարվածի կամ այլ սադրանքների միջոցով): Հատուկ ուշադրություն է դարձվում Հյուսիսատլանտյան պայմանագրի 5-րդ հոդվածը կատարելու ԱՄՆ պատրաստակամությանը, որը նախատեսում է նաև դաշինքի երկրների հավաքական պաշտպանություն:
Վերջին շաբաթներին ռուսական անօդաչու թռչող սարքերը բազմիցս հատել են ՆԱՏՕ-ի անդամ երկրների, այդ թվում՝ Ռումինիայի և Լեհաստանի օդային տարածքը: Այս ֆոնին Մոսկվան նաև խստացրել է Ուկրաինային տրամադրվող արևմտյան ռազմական աջակցության վերաբերյալ հռետորաբանությունը:
Ռուսաստանի ԱԳՆ-ն հայտարարել է, որ Մեծ Բրիտանիան և Ֆրանսիան «կրակի հետ են խաղում»՝ Կիևին ռուսական տարածքին հեռահար հարվածներ հասցնելու տեխնոլոգիաներ տրամադրելով: Ռուսական դիվանագիտական գերատեսչության ներկայացուցիչը նաև սպառնացել է հարվածներ հասցնել ինչպես Ուկրաինայի տարածքում, այնպես էլ նրա սահմաններից դուրս գտնվող բրիտանական ռազմական օբյեկտներին:
