ՌԴ ԳԱ Հնագիտության ինստիտուտի հնագետները Կոլոմնայի պատմական կենտրոնում իրականացված փրկարարական պեղումների ընթացքում հայտնաբերել են 15-րդ դարի ավելի քան 2,6 հազար արծաթե մետաղադրամ, հայտնում է ՌԻԱ Նովոստին։
Գանձը գտնվում էր տեղական արտադրության կավե սափորի մեջ և շուրջ 600 տարի անձեռնմխելի մնացել էր հողի տակ։
Գտածոն արել են ՌԴ ԳԱ Հնագիտության ինստիտուտի Մերձմոսկովյան արշավախմբի մասնագետները՝ Կոլոմնայի կրեմլից ոչ հեռու։ Չնայած դարավոր կառուցապատմանն ու մշակութային շերտի վնասվածքներին՝ ստորին շերտերում պահպանվել են 14–15-րդ դարերի քաղաքի կյանքի վկայություններ։
Գանձի հիմնական մասը կազմում են մեծ իշխան Վասիլի I Դմիտրիևիչի և նրա որդու՝ Վասիլի II Վասիլիևիչ Մութի մետաղադրամները։ Նախնական տվյալներով՝ դրանք հատվել են 15-րդ դարի երկրորդ և երրորդ տասնամյակներում։
Գիտնականները գտածոն հատկապես արժեքավոր են համարում դրա ամբողջականության շնորհիվ. բոլոր մետաղադրամները պահպանվել են միասին, ինչը թույլ կտա վերակառուցել դրամաշրջանառությունը և ճշտել Վասիլի I-ի կառավարման վերջին տարիների և Վասիլի II-ի կառավարման առաջին տարիների դրամահատումների առանձնահատկությունները։
Մասնագետների գնահատմամբ՝ գանձի արժեքը կազմել է մոտ 13 ռուբլի։ Համեմատության համար՝ 15-րդ դարում քաղաքային տուն կարելի էր գնել մոտավորապես 4–6 ռուբլով, իսկ ձիերի երամակը արժեր մոտ մեկ ռուբլի։
Ենթադրաբար, գանձը թաքցրել են 1425–1427 թվականներին, երբ ռուսական հողերում տարածվում էր ժանտախտի համաճարակը։ Հետազոտության ավարտից հետո գտածոն նախատեսվում է փոխանցել Կոլոմնա-Զարայսկի պետական թանգարան-արգելոցին։
