ՌԴ Դաշնության խորհրդի նախագահ Վալենտինա Մատվիենկոն հեռախոսազրույց է ունեցել Հայաստանի Ազգային ժողովի նախագահ Ռուբեն Ռուբինյանի հետ։ Ըստ Դաշնության խորհրդի՝ զրույցը կայացել է հայկական կողմի նախաձեռնությամբ
«Զրույցի ընթացքում Մատվիենկոն ընդգծել է Ռուսաստանի և Հայաստանի միջև կառուցողական երկխոսության պահպանման կարևորությունը։ Նրա խոսքով՝ ռուս-հայկական հարաբերություններն այսօր հիշեցնում են «միակողմանի երթևեկությամբ փողոց». Երևանի կողմից հնչում են Ռուսաստանի հետ հարաբերությունների պահպանման կարևորության մասին հայտարարություններ, սակայն, ըստ նրա, այդ խոսքերը հաճախ չեն համապատասխանում գործնական քայլերին։
Դաշնության խորհրդի նախագահն անդրադարձել է նաև Հայաստանի ղեկավարության՝ Եվրոպական միությանը միանալու մտադրությանը։ Նրա խոսքով՝ այդ գործընթացը կնշանակի խախտել այն սկզբունքները, որոնց վրա հիմնված է համագործակցությունը Եվրասիական տնտեսական միության (ԵԱՏՄ) շրջանակում։ Նա ընդգծել է, որ ռուսական կողմն աջակցում է վարչապետ Նիկոլ Փաշինյանի նախաձեռնությանը՝ Հայաստանում այդ հարցով համազգային հանրաքվե անցկացնելու վերաբերյալ։
Կողմերը քննարկել են միջխորհրդարանական համագործակցության հեռանկարները։ Անկախ պետությունների համագործակցության (ԱՊՀ) անդամ պետությունների Միջխորհրդարանական վեհաժողովը ակնկալում է, որ Հայաստանի Ազգային ժողովը և անձամբ Ռուբեն Ռուբինյանը կշարունակեն մասնակցել դրա գործունեությանը։ Նշվել է նաև երկկողմ միջխորհրդարանական համագործակցության հանձնաժողովի աշխատանքի վերականգնման կարևորությունը, որի հերթական նիստը նախատեսվում է անցկացնել մոտ ժամանակներս։
Զրույցի ընթացքում քննարկվել են նաև հումանիտար և մշակութային համագործակցության հարցեր։ Վալենտինա Մատվիենկոն կարևորել է Հայաստանի միացումը Ռուսաց լեզվի միջազգային կազմակերպությանը (ՄՈՌՅԱ), ինչպես նաև մշակութային և հումանիտար նախաձեռնությունների իրականացումը, այդ թվում՝ Ռուսաստանում Հայաստանի մշակույթի օրերի անցկացումը և Հայաստանի քաղաքներում Ռուսաստանի գիտության և մշակույթի կենտրոնների մասնաճյուղերի բացումը։
Դաշնության խորհրդի նախագահը նաև ուշադրություն է հրավիրել երրորդ երկրների հարցումների հիման վրա Հայաստանում Ռուսաստանի քաղաքացիների պարբերական ձերբակալությունների վրա։ Նրա խոսքով՝ եթե նման գործելակերպը շարունակվի, Ռուսաստանը ստիպված կլինի իր զբոսաշրջիկներին խորհուրդ տալ չայցելել Հայաստան։
Վալենտինա Մատվիենկոն, կարևորելով միջտարածաշրջանային և միջհամայնքային կապերի ակտիվացումը, հույս է հայտնել, որ երկու երկրների տարածաշրջանների միջև համագործակցության վերաբերյալ նախապատրաստված փաստաթղթերը հնարավորինս շուտ կստորագրվեն։
Կողմերը պայմանավորվել են շարունակել երկխոսությունը երկկողմ օրակարգի արդիական հարցերի շուրջ», - նշված է հրապարակման մեջ։
