ԱՄՆ նախագահ Դոնալդ Թրամփը հայտարարել է, որ Իրանը պարտվում է Միացյալ Նահանգների հետ հակամարտությունում՝ միաժամանակ քննադատելով լրատվամիջոցներին, որոնք, նրա խոսքով, ներկայացնում են հակառակ պատկեր։
Թրամփը պնդել է, որ Իրանի ռազմածովային և ռազմաօդային ուժերը զգալիորեն թուլացվել են, հակաօդային պաշտպանության համակարգերը չեն գործում, իսկ հրթիռների և անօդաչու թռչող սարքերի արտադրական կարողությունները լուրջ վնաս են կրել։
Նա նաև նշել է, որ Իրանի գլխավոր սպառնալիքներից մեկը կարող են մնալ ծովային ականները, թեև դրանց տեղակայման վերաբերյալ հստակ տվյալներ չկան։ ԱՄՆ նախագահի խոսքով՝ Վաշինգտոնն արդեն սկսել է Հորմուզի նեղուցի ականազերծման աշխատանքները՝ ապահովելու համար միջազգային նավարկության անվտանգությունը։
«Սկսել ենք Հորմուզի նեղուցի մաքրման գործընթաց՝ որպես ծառայություն աշխարհի տարբեր երկրներին, այդ թվում՝ Չինաստանին, Ճապոնիային, Հարավային Կորեային, Ֆրանսիային, Գերմանիային և շատ ուրիշների։ Զարմանալի է, որ նրանք չունեն քաջություն կամ կամք՝ այս աշխատանքը կատարելու համար»,- գրել է նա։
