Գերմանիայի արևմտյան Զոլինգեն քաղաքում (Հյուսիսային Հռենոս-Վեստֆալիա) դանակով հարձակման հետևանքով մի քանի մարդ է վիրավորվել, գրում է Bild պարբերականը։
Ըստ պարբերականի՝ քաղաքի կենտրոնում այժմ ընթանում է ոստիկանական լայնածավալ գործողություն։ Իրավապահ մարմինները սկզբում չեն բացահայտել գործողության պատճառները։ Սակայն նշվում է, որ դա դանակով հարձակում է, որի հետևանքով մի քանի մարդ վիրավորվել է։ Ըստ պարբերականի՝ դեպքի վայրում են գտնվում առնվազն շտապօգնության մեկ ավտոմեքենա և վերակենդանացման անհրաժեշտ սարքավորումներով մեկ ավտոմեքենա։
Մի քանի մարդ վիրավորվել է։ Փողոցում դեռևս արյունոտ դանակ է ընկած, գրում է Bild-ը։ Ըստ որոշ տեղեկությունների՝ մեկ անձ ձերբակալվել է։ Թե ինչ է իրականում տեղի ունեցել Զոլինգենի կենտրոնում, դեռևս պարզ չէ։ Գործողությանը մասնակցում են բազմաթիվ ոստիկանական ստորաբաժանումներ։
Ներկա պահին իրավապահ մարմինները, ինչպես ընդգծում է Bild-ը, միջադեպը չեն որակում որպես զանգվածային սպանություն կամ ահաբեկչական գործողություն։ Ենթադրաբար, բախում է եղել երեք անձի մասնակցությամբ։ Բոլորն, ըստ երևույթին, ձերբակալվել են։ Մասնակիցներից մեկը կրծքավանդակին դանակով մի քանի վիրավորում է ստացել։ Մյուս երկուսը թեթև վնասվածքներ են ստացել։ Պարբերականի տվյալներով՝ երկու մարդ սկսել է վիճել, իսկ երրորդն, ըստ երևույթին, փորձել է բաժանել վիճաբանողներին և նույնպես վիրավորվել է։ Bild-ը նշում է, որ միջադեպի մասնակիցներն, ըստ ամենայնի, Թուրքիայի երկու քաղաքացի և թուրքական ծագում ունեցող մեկ գերմանացի են եղել։
