Աչքի հիվանդություններով տառապող հազարավոր Գազայի բնակիչներ վտանգի տակ են տեսողության մշտական կորստի՝ ակնաբուժական վիրահատությունների համար նախատեսված դեղորայքի և սարքավորումների պակասի պատճառով, հաղորդում է էմիրաթական The National թերթը՝ հղում անելով տեղի բժիշկներին։
«Գազայի հատվածում աչքի հիվանդություններով հազարավոր հիվանդներ վտանգի տակ են տեսողությունը կորցնելու, քանի որ աչքի վիրահատությունների համար անհրաժեշտ բժշկական սարքավորումները և այլ պարագաները տարածք մուտք գործելը արգելված է։ Մեր ամենալուրջ խնդիրը դարձել է ախտորոշիչ սարքավորումների և անհրաժեշտ դեղորայքի պակասը», - թերթին ասել է Գազա քաղաքի աչքի հիվանդանոցներից մեկի ղեկավարը։
Նրա խոսքով՝ ակնաբուժական բուժման և վիրահատությունների սպասման ցուցակներում կա մոտ 9000 հիվանդ, բայց սրանք միայն նրանք են, ովքեր կարողացել են օգտվել հիվանդանոցներից, և կարիքավորների իրական թիվը շատ ավելի մեծ է։ Գազայի հատվածի առողջապահության նախարարության տվյալներով՝ անկլավի մոտ 3000 բնակիչ կորցրել է տեսողությունը 2023 թվականի հոկտեմբերին ռազմական գործողությունների սկսվելուց ի վեր։
Եվս 17000 մարդ աչքի վնասվածքներ է ստացել, հիմնականում պայթյուններից և բեկորներից։
