Օմանի արտաքին գործերի նախարար Բադր ալ-Բուսաիդին, որը միջնորդում է Վաշինգտոնի և Թեհրանի միջև բանակցություններում, կարծում է, որ Իրանը պատրաստ է քննարկել իր հրթիռները ԱՄՆ-ի հետ, ինչպես նաև միջուկային դոսիեին չառնչվող այլ հարցեր: Նա այս մասին հայտարարել է ամերիկյան CBS հեռուստաալիքին տված հարցազրույցում։
«Ես կարծում եմ, որ Իրանը պատրաստ է քննարկել ամեն ինչ», - պատասխանել է ալ-Բուսաիդին այն հարցին, թե արդյոք Իրանը կհամաձայնվի խորհրդակցությունների ժամանակ քննարկել ոչ միայն իր միջուկային ծրագիրը, այլև իր բալիստիկ հրթիռները:
«Այժմ առաջնահերթությունը միջուկային հարցը լուծելն է պատշաճ համաձայնագրի միջոցով, որը հստակորեն կսահմանի երկու կողմերի պարտավորությունները։
Ես կարծում եմ, որ մենք քննարկել և հնարավոր է՝ համաձայնության ենք եկել միջուկային ծրագրին չառնչվող հարցերի քննարկման մոտեցման շուրջ՝ Իրանի և նրա հարևանների միջև տարածաշրջանային երկխոսության համատեքստում», - բացատրել է ալ-Բուսաիդին:
