Վրաստանի իշխանությունները Ռուսաստանի հետ բանակցություններ չեն վարել դիվանագիտական հարաբերությունների կամ երկաթուղային հաղորդակցության վերականգնման վերաբերյալ, երկուշաբթի օրը հայտարարել է Վրաստանի վարչապետ Իրակլի Կոբախիձեն։
Ռուսաստանի փոխվարչապետ Ալեքսեյ Օվերչուկը փետրվարի 12-ին հայտարարել է, որ քննարկվում է Ռուսաստանի և Վրաստանի միջև Աբխազիայի միջոցով երկաթուղային հաղորդակցության վերականգնման հնարավորությունը։
«Մենք այս կապակցությամբ որևէ կապ չենք ունեցել։ Եթե այս առումով որևէ նոր բան ի հայտ գա, մենք ինքներս կտրամադրենք համապատասխան տեղեկատվությունը հանրությանը», - հայտարարել է Կոբախիձեն՝ պատասխանելով լրագրողի հարցին, թե արդյոք վրացական կողմը «ոչ պաշտոնական» կապ է ունեցել ռուսական կողմի հետ դիվանագիտական հարաբերությունների կամ երկաթուղային կապի վերականգնման վերաբերյալ։
Ռուսաստանը և Վրաստանը դիվանագիտական հարաբերություններ չունեն. երկխոսությունը պահպանվել է Ժնևում Անդրկովկասի վերաբերյալ քննարկումների շրջանակներում: Դիվանագիտական հարաբերությունները խզվել են Վրաստանի կողմից, այն բանից հետո, երբ Մոսկվան ճանաչեց Աբխազիայի և Հարավային Օսիայի ինքնիշխանությունը 2008 թվականի օգոստոսի 26-ին: Թբիլիսին չի ճանաչում այս հանրապետությունների ինքնիշխանությունը՝ դրանք համարելով օկուպացված տարածքներ:
