Գերմանիայում վերջին երկու ամիսների ընթացքում տեղի է ունեցել առնվազն հինգերորդ բանկային կողոպուտը։ Բրեմենի մոտ գտնվող Շտուր քաղաքում փետրվարի 13-ին անհայտ անձինք ներթափանցել են Volksbank բանկի տեղական մասնաճյուղի նկուղ, կոտրել և դատարկել 14 սեյֆ։ Պատճառված վնասի չափը դեռևս անհայտ է։
Կողոպուտի ընթացքում հանցագործները Բլոկեներ փողոցում գտնվող շենքի նկուղում ցանել են անհայտ հեղուկ։ Ենթադրաբար դրա հետևանքով մասնաճյուղի աշխատակիցները բողոքել են վատ ինքնազգացողությունից և սրտխառնոցից։ Դեպքի վայր են ժամանել հրշեջներն ու բժիշկները, որոնք օգնություն են ցուցաբերել երկու աշխատակցի։ Տարածքը տարհանվել է։ Չափումները չեն արձանագրել որևէ վտանգավոր նյութի թույլատրելի խտության գերազանցում։
2025 թվականի դեկտեմբերի 17-ին Բոննի կենտրոնում գտնվող Sparkasse բանկի մասնաճյուղում բացվել էր երկու սեյֆ, որոնցից գողացվել էին մեծարժեք իրեր, հիմնականում՝ ոսկի։ Ոստիկանությունը հայտնել էր, որ հանցագործության մեջ կասկածվում է բանկի 22-ամյա նախկին աշխատակիցը։ Նրա բնակարանում խուզարկություն է իրականացվել, բերման են ենթարկել, սակայն հետո ազատ արձակել՝ ձերբակալելու հիմքեր չգտնելու պատճառով։
Դեկտեմբերի 29-ի առավոտյան Գելզենկիրխենի Sparkasse բանկի անվտանգության ծառայությունը հայտնաբերել էր, որ պահոցում կոտրվել է շուրջ 3200 սեյֆ՝ գումարով, ոսկով և այլ թանկարժեք իրերով։ Հանցագործները պահոց էին ներթափանցել հարակից ավտոկայանատեղիից՝ պատը ծակելով։ Որոշ տվյալներով՝ վնասի չափը կարող է գերազանցել 100 մլն եվրոն․ այս կողոպուտը կոչվում է Գերմանիայի պատմության խոշորագույններից մեկը։
Դեկտեմբերի 30-ին Գալլե քաղաքի կայարանամերձ փողոցում գտնվող բանկի մասնաճյուղում աշխատանքային օրվա ընթացքում անհայտ անձինք կոտրել էին չորս սեյֆ։ Իսկ հունվարի 29-ին Վիլհելմսհաֆենի Sparkasse մասնաճյուղում կոտրվել էր 18 սեյֆ։ Քննիչները պարզում են՝ արդյոք այս բոլոր կողոպուտների միջև կապ կա։
