Թուրքիայի արտգործնախարար Հաքան Ֆիդանի կարծիքով՝ Միացյալ Նահանգները պատրաստ է փոխզիջման գնալ Իրանի հետ ուրանի հարստացման հարցում։ Նրա խոսքով՝ բոլոր խնդիրների կոշտ և անզիջում լուծման վրա պնդելը կարող է տարածաշրջանում պատերազմի հանգեցնել։ Այս մասին գրում է Financial Times թերթը՝ հղում անելով նախարարի հայտարարություններին։
«Հաքան Ֆիդանը, որը կարևոր դեր է խաղացել հակամարտությունը կանխելու ուղղությամբ միջնորդական ջանքերում, հայտնել է Financial Times-ին, որ Վաշինգտոնը հասկացրել է՝ պատրաստ է ճկունություն ցուցաբերել Իրանի կողմից ուրանի հարստացումը ամբողջությամբ դադարեցնելու հիմնական պահանջի հարցում։Այս պայմանը երկար ժամանակ հանդիսացել է համաձայնագրի գլխավոր խոչընդոտը, քանի որ Իրանը, որպես Միջուկային զենքի չտարածման պայմանագրի մասնակից, պնդում է ուրանը հարստացնելու իր իրավունքը»,- գրում է պարբերականը։
Թուրքիայի դիվանագիտության ղեկավարը նաև հայտարարել է, որ «թե՛ ԱՄՆ-ը, թե՛ Իրանը, ըստ երևույթին, պատրաստ են փոխզիջման գնալ միջուկային համաձայնագիր կնքելու համար», սակայն նախազգուշացրել է, որ բանակցությունների ընդլայնումը դեպի Թեհրանի բալիստիկ հրթիռների ծրագիր և այդ հարցում համառությունը կարող են «միայն նոր պատերազմի» հանգեցնել, նշել է պարբերականը։
