Իսրայելի վարչապետ Բենյամին Նեթանյահուն առաջիկա հանդիպման ընթացքում մտադիր է ԱՄՆ նախագահ Դոնալդ Թրամփին հետախուզական տվյալների միջոցով անձամբ համոզել, որ Իրանը սպառնալիք է ոչ միայն հրեական պետության, այլև, իբր, ամբողջ Մերձավոր Արևելքի և նույնիսկ Եվրոպայի համար։ Այս մասին, հղում անելով իսրայելական աղբյուրներին, հայտնել է Al-Monitor պորտալը։
«Կարևոր է, որ նախագահը լսի ամեն ինչ առաջին ձեռքից», — նշել է Իսրայելի վարչապետի խորհրդականներից մեկը։
Նրա խոսքով՝ Նեթանյահուն հույս ունի հասնել նրան, որ Վաշինգտոնի և Թեհրանի միջև բանակցային օրակարգում ընդգրկվի նաև Իրանի բալիստիկ հրթիռային ծրագրի հարցը, ինչպես նաև Մերձավոր Արևելքի առանձին երկրներում գործող իրանամետ խմբավորումների թեման։ «Նեթանյահուն ամեն ինչ կբացատրի նախագահին, որպեսզի նա հասկանա, որ Իրանի հետ համաձայնության հասնելը հնարավոր չէ առանց բալիստիկ հրթիռների հարցի կարգավորման», — հավելել է աղբյուրը։
Al-Monitor-ի տվյալներով՝ իսրայելական պաշտոնյաները նաև մտահոգված են ԱՄՆ նախագահի հատուկ ներկայացուցիչ Սթիվեն Ուիթքոֆի ազդեցությամբ Սպիտակ տանը որոշումների ընդունման գործընթացի վրա, քանի որ նա Թրամփից հեռացնում է Իրանի դեմ հարված հասցնելու կողմնակիցներին։
