ԱՄՆ վարչակազմը ռուսական կողմի հետ բանակցություններ է վարում Ռազմավարական հարձակողական սպառազինությունների կրճատման մասին պայմանագրի (ՍՆՎ) նորացված տարբերակի կնքման վերաբերյալ։ Այդ մասին հայտարարել է ԱՄՆ փոխնախագահ Ջեյ Դի Վենսը։
«Սրանք շարունակական բանակցություններ են։ Ակնհայտ է, որ նախագահի արտաքին քաղաքականության առանձնահատկություններից մեկը միջուկային տարածման մերժումն է։ Կարծում եմ՝ ամերիկյան ժողովրդի համար ամենավատ սցենարը այն է, երբ աշխարհում ավելի ու ավելի շատ ռեժիմներ ձեռք են բերում միջուկային զենք։ ՍՆՎ-ն դրա կարևոր բաղադրիչներից է։ Այն կփոխվի՝ համեմատած նախկին տարբերակի հետ, և դա հենց այն բանակցությունների մասն է, որոնք մենք վարում ենք ռուսների հետ», — ասել է նա լրագրողներին։
Վենսը վստահություն է հայտնել, որ ԱՄՆ վարչակազմը «կհասնի ամերիկյան ժողովրդի համար դրական արդյունքի՝ սահմանափակելով միջուկային զենքի տարածումը»։
Ռուսաստանի և ԱՄՆ-ի միջև ռազմավարական հարձակողական սպառազինությունների հետագա կրճատման և սահմանափակման միջոցների մասին պայմանագիրը (ՍՆՎ)՝ որպես միջուկային զենքի տեղակայումը կարգավորող վերջին միջազգային-իրավական գործիքներից մեկը, ավարտվել է փետրվարի 5-ին։ ԱՄՆ-ը առաջարկում էր պայմանագրի սահմանափակումները տարածել նաև Չինաստանի վրա։
