Ռուսաստանի իշխանությունները որոշել են Telegram մեսենջերի աշխատանքը դանդաղեցնել. հաղորդում է RBC-ն՝ հղում անելով տեղեկատվական տեխնոլոգիաների ոլորտի և համապատասխան պետական մարմինների աղբյուրներին:
Մասնագետները կարծում են, որ դա կարող է նշանակել մեսենջերի լիակատար արգելափակում. գրում է BBC News-ը։
РБК-ի աղբյուրները հայտնել են, որ «Ռոսկոմնադզորը» Telegram-ի գործունեությունը կսահմանափակի արդեն փետրվարի 10-ից։
Ռոսկոմնադզորը սկսել է միջամտել մեսենջերի գործունեությանը անցյալ ամռանը։ Պաշտոնապես հայտարարվել է, որ Telegram-ի գործունեությունը կսկսի սահմանափակել 2025 թվականի օգոստոսի 13-ից։ Միևնույն ժամանակ, կառույցը հայտարարել է, որ Ռուսաստանը «միջոցներ է ձեռնարկում WhatsApp-ի զանգերը մասնակիորեն սահմանափակելու համար»։
Կարգավորող մարմինը բացատրել է, որ մեսենջերները, ենթադրաբար, դարձել են «հիմնական ձայնային ծառայությունները, որոնք օգտագործվել են խաբեության և փող շորթելու, ինչպես նաև Ռուսաստանի քաղաքացիներին դիվերսիոն և ահաբեկչական գործունեության մեջ ներգրավելու համար»։
Ռուսաստանի իշխանությունները իրենց գործողությունները բացատրում են նաև Telegram-ի և WhatsApp-ի կողմից «ՏՏ ընկերությունների մասին» օրենքի չկատարմամբ, ինչը նշանակում է, որ նրանք չեն պահպանում օգտատիրոջ տվյալները Ռուսաստանում։
Մասնագետները նշում են, որ այս կերպ իշխանությունները, հավանաբար, ստիպում են Ռուսաստանի բնակիչներին անցնել Max Messenger-ին, որը կառավարությունը հուլիսին հայտարարել է որպես «ազգային Messenger»։
Անցյալ օգոստոսին «На связи» նախագիծը, որը հետևում է RuNet-ի արգելափակումներին, Telegram-ի աշխատանքի խափանումներ է գրանցել Ռուսաստանի 89 շրջաններից առնվազն 25-ում: Օգտատերերը մեկ շաբաթ առաջ արդեն զանգվածաբար բողոքում էին, որ չեն կարողանում ձայնային զանգեր կատարել և երբեմն նույնիսկ տեքստային հաղորդագրություններ ուղարկել: Մեսենջերի աշխատանքի վերաբերյալ առաջին բողոքները սկսեցին ստացվել հունիսի վերջին և հուլիսի սկզբին:
Որոշ վերլուծաբաններ սա կապեցին հավելվածի հնարավոր փորձնական արգելափակման հետ։ «Կոմերսանտ» թերթը, հղում անելով աղբյուրներին, 2024 թվականի դեկտեմբերին հաղորդել էր, որ Կրեմլը քննարկում է առաջիկա արգելափակումը։
