ԱՄՆ նախագահ Դոնալդ Թրամփը երկարաձգել է այն համաձայնագրի գործողությունը, որը 32 աֆրիկյան երկրների համար ապահովում է անտուրք մուտք Միացյալ Նահանգների շուկա։ Այդ մասին հայտնել է ԱՄՆ առևտրային բանակցությունների հարցերով ներկայացուցչի գրասենյակը։
Թրամփը ստորագրել է համապատասխան օրենքը, որով համաձայնագրի գործողությունը երկարաձգվել է 2025 թվականի սեպտեմբերի 30-ից մինչև 2026 թվականի դեկտեմբերի 31-ը։ Այդ պայմանավորվածությունները ձեռք էին բերվել 25 տարի առաջ։
Համաձայնագիրը թույլ է տալիս Միացյալ Նահանգներին տարեկան միլիարդավոր դոլարների չափով առանց մաքսատուրքերի ձեռք բերել շուրջ 1 800 տեսակի ապրանքներ, այդ թվում՝ ավտոմեքենաներ, հագուստ, ինչպես նաև գյուղատնտեսական արտադրանք մի շարք աֆրիկյան երկրներից։
Համաձայնագրի գործողությունը ավարտվել էր անցած աշնանը, ինչի հետևանքով Աֆրիկայում զգալի թվով աշխատատեղեր կրճատվեցին, իսկ արտահանողները ստիպված եղան վճարել բարձր մաքսատուրքեր։ Հետադարձ ուժ ունեցող օրենքը հնարավորություն տվեց պետության ղեկավարին երկարաձգել համաձայնագրի գործողությունը՝ չնայած այն հանգամանքին, որ այն արդեն իսկ ավարտված էր։
