Կոլումբիայի նախագահ Գուստավո Պետրոն հայտնել է, որ իր ամերիկացի գործընկեր Դոնալդ Թրամփին է փոխանցել հանրապետությունից դուրս բնակվող թմրաբարոնների անունների ցուցակը և ընդգծել նրանց դեմ համատեղ ջանքերով պայքարելու անհրաժեշտությունը։
«Թմրանյութերի առևտրի առաջին գծում կանգնած են նրանք, ովքեր ապրում են Դուբայում, Մադրիդում, Մայամիում։ Ես նրանց և նրանց հետ կապված անձանց անունները փոխանցել եմ նախագահ Թրամփին։ Սրանք հիմնական ղեկավարներն են։
Նրանց գումարները գտնվում են Կոլումբիայից դուրս, և անհրաժեշտ է նրանց համատեղ հետապնդել՝ տարբեր երկրների հետախուզական ծառայությունների համագործակցությամբ»,-ասել է նա Վաշինգտոնում ԱՄՆ նախագահի հետ հանդիպումից հետո կայացած մամուլի ասուլիսի ընթացքում։
Պետրոյի կարծիքով՝ թմրանյութերի առևտրի դեմ հաղթանակի հասնելու համար առաջնահերթ անհրաժեշտ է ձերբակալել հանցավոր շղթաների ղեկավարներին, որոնց թվում կան նաև կոլումբիացիներ, սակայն նրանք մեծամասնություն չեն կազմում։
