ԿԺԴՀ-ի արձակած, ամենայն հավանականությամբ, բալիստիկ հրթիռները վտանգ չեն ներկայացրել ԱՄՆ ուժերի կամ նրանց դաշնակիցների համար։ Այս մասին նշված է Հարավային Կորեայում ԱՄՆ ուժերի հաղորդագրության մեջ։
«Մենք տեղյակ ենք հրթիռային արձակումներից և իրականացնում ենք սերտ խորհրդատվություններ մեր դաշնակիցների և գործընկերների հետ։ Ընթացիկ գնահատականների հիման վրա՝ այս միջադեպը վտանգ չի ներկայացրել ԱՄՆ ուժերին կամ տարածքին, ինչպես նաև մեր դաշնակիցներին։
Միացյալ Նահանգները շարունակում են հավատարիմ մնալ ԱՄՆ տարածքի և տարածաշրջանում մեր դաշնակիցների պաշտպանությանը», — ասվում է X սոցիալական ցանցում հրապարակված հայտարարության մեջ։
Ավելի վաղ Ճապոնիայի ծովային պահպանության ծառայությունը տեղեկացրել էր ԿԺԴՀ-ի հրթիռային արձակումների մասին՝ կոչ անելով տարածաշրջանում գտնվող նավերին, եթե հայտնաբերեն հրթիռների բեկորներ, չմոտենալ դրանց և անմիջապես կապ հաստատել իշխանությունների հետ։ Kyodo գործակալությունը հայտնել է, որ ԿԺԴՀ-ն երեքշաբթի արձակել է մի քանի, ամենայն հավանականությամբ, բալիստիկ հրթիռներ դեպի Ճապոնական ծով։ Դրանք ընկել են Ճապոնիայի բացառիկ տնտեսական գոտուց դուրս։
