Եվրոպական երկրները ինչ-որ փուլում ստիպված կլինեն սկսել բանակցություններ Ռուսաստանի հետ, սակայն այդ պահը դեռևս չի հասել։ Այդպիսի կարծիք է հայտնել Ֆինլանդիայի վարչապետ Պետտերի Օրպոն Iltalehti թերթին տված հարցազրույցում։
Օրպոն ընդգծել է, որ պատրաստ է նստել բանակցությունների սեղանի շուրջ Ռուսաստանի նախագահ Վլադիմիր Պուտինի հետ, սակայն կարծում է, որ այդ խոսակցության ժամանակը դեռ չի եկել։ «Ինչպես և երբ սկսել երկխոսությունը պետք է որոշվի եվրոպական երկրների հետ համակարգված ձևով։
Ինչ վերաբերում է Ֆինլանդիային, Ռուսաստանը մեր հարևանն է, և եթե այս պատերազմը հնարավոր է ավարտել, ապա երկխոսությունը ինչ-որ պահի պետք է սկսվի, բայց այդ պահը դեռ չի հասել», — նշել է նա։
Ֆինլանդիայի վարչապետի կարծիքով՝ ներկայումս «գնդակը Ռուսաստանի դաշտում է», և Ֆինլանդիայի համար դժվար կլինի վերականգնել երկխոսությունը հարևանի հետ, քանի դեռ շարունակվում է Ուկրաինայի շուրջ հակամարտությունը։
«Երբ Ուկրաինայում խաղաղության հաստատման կամ հրադադարի հարցը գտնվում է Պուտինի ձեռքում, հենց Ռուսաստանից է կախված՝ կշարժվի արդյոք իրավիճակը երկխոսության վերականգնման ուղղությամբ», — ասել է նա։
Ավելի վաղ Politico պարբերականը, հղում անելով աղբյուրներին, հայտնել էր, որ Եվրամիության երկրները քննարկում են Ուկրաինայի կարգավորման շուրջ բանակցությունների համար հատուկ ներկայացուցիչ նշանակելու հնարավորությունը, որը համայնքի անունից երկխոսություն կվարի ռուսական կողմի հետ։ Այդ դերի հնարավոր թեկնածուների թվում նշվում է Ֆինլանդիայի նախագահ Ալեքսանդր Ստուբբը։
