Ղազախստանի նախագահ Կասիմ-Ժոմարտ Տոկաևը հայտարարել է, որ երկրի համար անհրաժեշտ է ամբողջական թվայնացում միգրացիայի վերահսկման ոլորտում, քանի որ Ղազախստանը կարող է դառնալ միգրանտների համար փոխադրման տրանզիտային հանգույց։ Այս մասին նա ասել է Գլխավոր դատախազությունում անցկացվող խորհրդակցության ժամանակ։
«Պետք է ամբողջական թվայնացում իրականացնել միգրացիայի կարգավորման ոլորտում։ Սա իսկապես շատ կարևոր խնդիր է, որի մասին մենք երկար ժամանակ խոսում ենք, սակայն դրական առաջընթացն առայժմ նվազ է։
Աշխարհում ձևավորվել է բարդ իրավիճակ։ Համարձակությամբ կարելի է ասել, որ միգրացիոն հոսքերը ողջ մոլորակի մասշտաբով ավելանում են։ Այս պայմաններում Ղազախստանը դառնում է հարմար փոխադրական հանգույց և գրավիչ երկիր արտերկրյա միգրանտների երկարաժամկետ կեցության համար»,-ասել է նախագահը։
Երկրի ղեկավարն ընդգծել է, որ առաջնահերթ խնդիր է արտասահմանցի քաղաքացիների ժամանակավոր հաշվառման և տեղաշարժի մոնիթորինգի համակարգերի արդիականացումը՝ միգրացիոն վերահսկողությունը ապահովելու նպատակով, և այդ պատճառով հանձնարարել է կառավարությանը՝ Ազգային անվտանգության կոմիտեի հետ, արագացնել այս ուղղությամբ աշխատանքները։
