Իտալիայի վարչապետ Ջորջիա Մելոնին քննադատել է ԱՄՆ նախագահ Դոնալդ Թրամփին նրա խոսքերի համար, որ Աֆղանստանում ՆԱՏՕ-ի դաշնակիցներնի առաջնագծից «հեռու» են մնացել: Նա X սոցիալական ցանցում գրել է, որ Իտալիայի կառավարությունը ցնցված է Թրամփի հայտարարություններից։
«Իտալիայի կառավարությունը ցնցված է նախագահ Թրամփի հայտարարություններից, որ ՆԱՏՕ-ի դաշնակիցները «ետևում են մնացել» Աֆղանստանում գործողության ընթացքում: <…> Աֆղանստանում ՆԱՏՕ-ի երկրների ներդրումը նսեմացնող հայտարարությունները անընդունելի են, հատկապես, երբ դրանք հնչում են դաշնակցի կողմից», - նշել է նա։
Մելոնին ընդգծել է, որ 2001 թվականի սեպտեմբերի 11-ի ահաբեկչական հարձակումներից հետո ԱՄՆ-ում ՆԱՏՕ-ն իր պատմության մեջ առաջին և միակ անգամ կիրառել է իր կոլեկտիվ պաշտպանության 5-րդ հոդվածը, և որ սա «ԱՄՆ-ի հետ համերաշխության արտակարգ ակտ» էր: Վարչապետի խոսքով՝ Իտալիան այդ ժամանակ «տեղակայել է հազարավոր զորքեր» և «լիակատար պատասխանատվություն» ստանձնել «ամբողջ միջազգային առաքելության ամենակարևոր օպերատիվ տարածքներից մեկի» համար։
Մելոնին հիշեցրել է, որ Աֆղանստանում հակամարտության ժամանակ Իտալիան ունեցել է 53 զոհ, վիրավորվել է ավելի քան 700 զինվոր։ Նա նաև գրել է, որ «բարեկամությունը պահանջում է հարգանք», որն իր հերթին «հիմնարար պայման է դաշինքի հիմքում ընկած համերաշխությունը պահպանելու համար»։
