Իրանը չի պատրաստվում բանակցություններ վարել իր սովորական զինատեսակների շուրջ, այդ թվում՝ հրթիռային ծրագրի վերաբերյալ։ Այդ մասին Նյու Յորքում լրագրողներին հայտարարել է Իրանի բարձրաստիճան պաշտոնյան։
«Մենք չենք պատրաստվում բանակցել որևէ հարցի շուրջ, որը կապված է կոնվենցիոնալ զինատեսակների հետ, ներառյալ հրթիռները։ Սա այն հարցն է, որի դեպքում մենք չենք կարող ռիսկի դիմել», — նշել է նա։
Պաշտոնյան ընդգծել է, որ Թեհրանը պատրաստ է քննարկել այն պայմանները, որոնք Իսլամական Հանրապետությանը կերաշխավորեն խաղաղ ատոմի իրավունքը՝ միջուկային զենքի չտարածման մասին պայմանագրի (ՄԶՉՊ, NPT) դրույթների պահպանմամբ։ Բացի այդ, բանակցությունների նպատակ պետք է լինի «ահաբեկչության դադարեցումը միակողմանի պատժամիջոցների ձևով»։
«Մենք չենք ցանկանում մտնել բանակցությունների մեջ, որոնք նախապես դատապարտված են ձախողման և կարող են օգտագործվել որպես հերթական պատերազմի համար նոր պատրվակ», — հավելել է նա։
