ԱՄՆ նախագահ Դոնալդ Թրամփը խուսափել է 2028 թվականի նախագահական ընտրություններում իր հաջորդի մասին հարցին ուղիղ պատասխան տալուց՝ ասելով, որ դեռ վաղ է նման զրույցներ վարելու համար։
NewsNation-ին տված հարցազրույցում Թրամփին հարցրել են, թե արդյոք Հանրապետական կուսակցությունում կա որևէ մեկը, ով կարող է դառնալ ապագա նախագահի թեկնածու և շարունակել Թրամփի սկսած աշխատանքը։
«Մենք ունենք թեկնածուների գերազանց ընտրական ցուցակ, մենք ունենք շատ տաղանդավոր մարդիկ», - պատասխանել է նախագահը: Նա ընդունել է, որ իրավահաջորդի դերի թեկնածուների շրջանում ունի ֆավորիտներ, բայց նշել, որ «դեռ շատ վաղ է» այս մասին խոսելու համար:
Թրամփը իր վարչակազմի այն պաշտոնյաների թվում, որոնց աշխատանքից գոհ է, նշել է փոխնախագահ Ջ.Դ. Վենսին, պետքարտուղար Մարկո Ռուբիոյին, ֆինանսների նախարար Սքոթ Բեսենթին, հայրենիքի անվտանգության նախարար Քրիստի Նոեմին և սահմանային անվտանգության և անօրինական ներգաղթյալների վտարման պատասխանատու Թոմաս Հոմանին։
«Ես կարող եմ ձեզ անվանել 20 ֆենոմենալ մարդ», - եզրափակել է ամերիկացի առաջնորդը։
