ՀՀ Գլխավոր դատախազությունը բողոքարկելու է դատարանի որոշումը, որով Քննչական կոմիտեն Եկեղեցու բողոքի հիման վրա կպարտավորվի՝ դատական որոշման հիմքով հետաքննել արքեպիսկոպոս Նաթան Հովհաննիսյանի և նախկին հոգևորականի միջև հեռախոսազրույցի գաղտնալսման հանգամանքները։Խոսքը անցած տարի՝ հոկտեմբերի 17-ին, իշխանական լրատվամիջոցներով արտահոսք արված վաղեմություն ունեցող մի ձայնագրության մասին է, որում Նաթան Սրբազանի ու Վեհափառ Հայրապետի նախկին գավազանակրի խոսակցությունն է՝ Վեհափառ Հայրապետի մասին։Մասնավորապես, գավազանակիրը նեղսրտած դժգոհում է այդ ձայնագրությունում՝ Վեհափառ Հայրապետին մեղադրելով, թե իբր ստիպում է իրեն կառավարության դեմ ինչ-որ միտինգի մասնակցել ընտանիքի անդամների հետ։
Դեռ արտահոսքի ժամանակ ՀՀ գլխավոր դատախազությունից Aysor.am-ին հայտնել էին, որ ձայնագրությունը քննության առարկա կդառնա, բայց այդպես էլ քրեական գործ չհարուցվեց՝ պարզելու և բացահայտելու, թե ով էր իրականացրել գաղտնալսումը, ում հրամանով, և որքանով էր այդ ձայնագրությունը չաղճատված։
Իսկ երեկ փաստաբան Արա Զոհրաբյանը հայտարարեց, որ դատարանում շահել է գործը, ըստ որի պետք է պարտադիր քրեական գործ հարուցվի՝ արքեպիսկոպոս Նաթան Հովհաննիսյանի հեռախոսազրույցների գաղտնալսման վերաբերյալ։
Փաստորեն, ՀՀ գլխավոր դատախազությունը դեմ է, որ այդ ապօրինի գաղտնալսման հանգամանքները բացահայտվեն։«Որոշումը կբողոքարկվի ամեն դեպքում, այդ իսկ պատճառով քրեական վարույթ չի հարուցվի մինչև վերջնական որոշման կայացումը», — հայտնում են Քննչական կոմիտեից։
