Ֆրանսիայի զինված ուժերի նախարար Կատրին Վոտրենը հրաժարվել է ասել, թե քանի միջուկային մարտագլխիկ ունի երկիրը իր զինանոցում՝ նշելով, որ երկիրը բարձրացնում է իր պաշտպանական կարողությունները տարբեր ոլորտներում։
«Դա գաղտնիք է։ Ես ձեզ չեմ ասի մարտագլխիկների քանակը, դա գերգաղտնի է», - ասել է նա Europe 1 ռադիոկայանի եթերում՝ հրաժարվելով հաստատել հաղորդավարի կողմից մեջբերված 290 մարտագլխիկների մասին տեղեկությունը։
«Բայց կարող եմ ասել, որ մեր երկիրը իսկապես զինվում է, զինվում է բոլոր ոլորտներում, քանի որ եթե նայեք Ուկրաինայի փորձին, պարզ է դառնում, որ մենք պետք է զինվենք բոլոր ոլորտներում, այսինքն՝ անօդաչու թռչող սարքերով, անօդաչու թռչող սարքերի դեմ սարքավորումներով, իհարկե, բայց նաև հետևակային ուժերով և ավիացիայով։
Որովհետև մենք շատ լավ հասկանում ենք, որ առկա սպառնալիքի առջև անհրաժեշտ է ավելին անել», - ասել է նա։
2020 թվականին Ֆրանսիայի նախագահ Էմանուել Մակրոնը հայտարարեց, որ հանրապետության միջուկային զինանոցը կազմում է 300-ից պակաս մարտագլխիկ։
