Ինչպես ավելի վաղ հայտնել էինք, հոկտեմբերի 10-ին ԱԺ «Հայաստան» խմբակցության պատգամավոր Ագնեսա Խամոյանը տեղեկացրել էր, որ կրկին գողացել էին իր ավտոմեքենայի կողային հայելիները։
ՆԳՆ ոստիկանությունը հոկտեմբերի 30-ին հայտնել է, որ ավտոմեքենաներից գողությունների վերաբերյալ առաջին հաղորդումները Համայնքային ոստիկանության Ավանի բաժնում ստացվեցին հոկտեմբերի 10-ին: Գողացել էին մայրաքաղաքի Ծարավ Աղբյուրի փողոցում կայանված «Լեքսուս» և «Շևրոլե» մակնիշի ավտոմեքենաների կողային հայելիների ապակիները։
Մինչ համայնքային ոստիկանները ձեռնարկել են դեպքերը բացահայտելուն ուղղված օպերատիվ-հետախուզական միջոցառումներ` հոկտեմբերի 15-ին և 20-ին ստացվել են նոր հաղորդումներ` նույն տեղից կատարված նմանատիպ մեկական գողությունների վերաբերյալ:
Ավան և Նոր Նորք վարչական շրջանների քննչական բաժնում նախաձեռնված քրեական վարույթի շրջանակում միջոցառումները շարունակվել և դրական արդյունքի են հասել հոկտեմբերի 29-ին։
Ավան-Առինջի բնակիչ 33-ամյա տղամարդն իր տանը հայտնաբերվել և հիշյալ գողութունները կատարելու կասկածանքով ձերբակալվել է:
Նույն օրը կատարված քննչական փորձարարության ժամանակ Ծարավ Աղբյուրի փողոցի հարակից տարածքներից նա ներկայացրել է գողոնի մի մասը:
Դատարանի որոշմամբ 33-ամյա տղամարդու նկատմամբ խափանման միջոց է կիրառվել տնային կալանքը:
Ձեռնարկվում են միջոցառումներ գողոնի մյուս մասը հայտնաբերելու ուղղությամբ։ Նախաքննությունը շարունակվում է:
