ԱՄՆ պաշտոնյաները հրահանգել են իրենց դիվանագետներին կոչ անել դաշնակիցներին քվեարկել ՄԱԿ-ի բանաձևի դեմ, որով կոչ է արվում վերացնել Կուբայի դեմ երկարատև առևտրային էմբարգոն: Որպես այդ որոշման դեմ փաստարկ՝ ԱՄՆ-ն մեջբերել է սեփական տվյալները, որոնց համաձայն՝ հազարավոր կուբացիներ կռվում են ռուսական զորքերի կողքին՝ Ուկրաինայի դեմ պատերազմում՝ գրում է Reuters-ը:
«Հյուսիսային Կորեայից հետո Կուբան ռուսական ագրեսիայի համար օտարերկրյա զորքերի ամենամեծ մատակարարն է. մոտավորապես 1000-5000 կուբացի է կռվում Ուկրաինայում»,- ասվում է պետքարտուղարության հաղորդագրության մեջ:
Reuters-ի տվյալներով՝ վերջին շաբաթներին ուկրաինացի պաշտոնյաները նախազգուշացրել են ամերիկացի օրենսդիրներին Ուկրաինայում ռազմական գործողություններին մասնակցելու համար Ռուսաստանի կողմից կուբացի վարձկանների հավաքագրման աճող ծավալների մասին:
ՄԱԿ-ի Գլխավոր ասամբլեան 1992 թվականից ի վեր ամեն տարի ձայների ճնշող մեծամասնությամբ ընդունում է Կուբայի դեմ ԱՄՆ-ի էմբարգոն վերացնելու մասին բանաձև: 2024 թվականին դրան աջակցել է 187 երկիր, դեմ են եղել միայն ԱՄՆ-ն ու Իսրայելը, իսկ Մոլդովան ձեռնպահ է մնացել։
Բանաձևը պարտադիր իրավական ուժ չունի։ Քվեարկությունը կոչված է ցույց տալու միջազգային քաղաքական ճնշումը Վաշինգտոնի վրա։ Հավանայի նկատմամբ առևտրային էմբարգոն կարող է հանել միայն ԱՄՆ Կոնգրեսը։ Դոնալդ Թրամփը 2025 թվականի հունվարին նախագահի պաշտոնը ստանձնելուց հետո ուժեղացրել է ճնշումը Կուբայի վրա և այն վերադարձրել ահաբեկչությունը հովանավորող երկրների ամերիկյան ցուցակ:
