Ֆրանսիայում Հարավային Աֆրիկայի դեսպան Նկոսինաթի Էմանուել Մթեթվան, որը նախկինում անհետ կորած էր համարվում, մահացած է հայտնաբերվել Փարիզի 17-րդ շրջանում, հաղորդում է Le Parisien թերթը՝ հղում անելով Փարիզի դատախազությանը։
Նրա մարմինը հայտնաբերվել է հյուրանոցի մոտ։ Նախնական տեղեկությունների համաձայն՝ դիվանագետը ընկել է 22-րդ հարկի պատուհանից։ Իրավապահ մարմինները հետաքննություն են անցկացնում։
Ինչպես նշել է դատախազությունը, դեսպանի կինը նրա անհետացման մասին հայտնել է նախորդ օրը, այն բանից հետո, երբ «նրանից անհանգստացնող հաղորդագրություն է ստացել»։
Մթեթվան նշանակվել է Հարավային Աֆրիկայի դեսպան Ֆրանսիայում 2024 թվականի փետրվարին։ 2009-2014 թվականներին նա զբաղեցրել է ոստիկանության գործերի նախարարի պաշտոնը, ապա ղեկավարել է սպորտի, արվեստի և մշակույթի նախարարությունը։
Ավելի վաղ հայտնել էինք, որ Ֆրանսիայում Հարավային Աֆրիկայի դեսպան Նկոսինաթի Էմանուել Մթեթվան անհետ կորել է Փարիզում։
58-ամյա դիվանագետի հետ կապը կորել է սեպտեմբերի 29-ի կեսօրին: Դեսպանատան անվտանգության ծառայությունը իրավապահ մարմիններին տեղեկացրել է միայն այդ երեկոյան: Ոստիկանությունը հետաքննություն է սկսել և հարցաքննել դեսպանի ընտանիքին:
