Սպիտակ տունը հրապարակել է ԱՄՆ նախագահ Դոնալդ Թրամփի «համապարփակ» 20 կետանոց ծրագիրը՝ Գազայի հատվածում հակամարտության դադարեցման վերաբերյալ, ասվում է փաստաթղթում։
«Նախագահ Դոնալդ Թրամփի համապարփակ ծրագիրը՝ Գազայում հակամարտությունը դադարեցնելու համար», - ասվում է փաստաթղթի վերնագրում։
Ծրագիրը, մասնավորապես, նախատեսում է, որ պատանդները կազատվեն Իսրայելի կողմից առաջարկվող համաձայնագրի ընդունումից հետո 72 ժամվա ընթացքում։ Գազան նաև «կազատվի ահաբեկչությունից» և կվերականգնվի։ ՀԱՄԱՍ-ը և այլ խմբավորումներ պետք է համաձայնվեն հրաժարվել Գազայի կառավարմանը իրենց ուղղակի կամ անուղղակի մասնակցությունից։ Տարածաշրջանային գործընկերները երաշխիքներ կտրամադրեն, որ ՀԱՄԱՍ-ը կկատարի իր պարտավորությունները։
Բոլոր պատանդների ազատ արձակումից հետո Իսրայելը ազատ կարձակի 250 ցմահ բանտարկյալների, ինչպես նաև Գազայի 1700 բնակիչների: ՀԱՄԱՍ-ի անդամները, որոնք կհամաձայնվեն զինաթափվել և խաղաղ համակեցություն հաստատել, կստանան ներում: Եթե նրանք ցանկանան լքել տարածաշրջանը, նրանց կտրամադրվի անվտանգ անցում դեպի ընդունող երկրներ:
Բացի այդ, այս համաձայնագրի ընդունման պահից անմիջապես կսկսվի մարդասիրական օգնության հոսքը դեպի Գազայի հատված։ Այն կհասցվի և կբաշխվի առանց որևէ կողմի միջամտության՝ Միավորված Ազգերի Կազմակերպության (ՄԱԿ) և դրա գործակալությունների, Կարմիր մահիկի և այլ միջազգային հաստատությունների միջոցով, որոնք կապված չեն որևէ կողմի հետ։
