ՄԱԿ-ի գլխավոր քարտուղար Անտոնիո Գուտերեշը հայտարարել է, որ արհեստական բանականությունն (ԱԲ) արդեն իսկ ազդում է խաղաղության և անվտանգության վրա և կոչ է արել ստեղծել գլոբալ կարգավորող շրջանակ և մարդկային վերահսկողություն ուժի կիրառման նկատմամբ։ Նա այս հայտարարությունն արել է արհեստական բանականությանը նվիրված ՄԱԿ-ի Անվտանգության խորհրդի նիստում։
«Եկեք հստակ լինենք. մարդկության ճակատագիրը չի կարող թողնվել ալգորիթմի հայեցողությանը։ Մարդիկ միշտ պետք է պահպանեն կյանքը և մահը որոշելու իշխանությունը»,-ասել է Գուտերեշը։
Նա կոչ է արել մինչև հաջորդ տարի կնքել իրավաբանորեն պարտավորեցնող համաձայնագիր՝ արգելելու «մարդկային վերահսկողության բացակայության դեպքում գործող մահացու ինքնավար զենքի համակարգերը» և ընդգծել, որ միջուկային զենքի օգտագործման ցանկացած որոշում «պետք է կայացվի մարդկանց, այլ ոչ թե մեքենաների կողմից»։
Գլխավոր քարտուղարը նշել է, որ վերջին հակամարտությունները դարձել են արհեստական բանականության վրա հիմնված ուղղորդման համակարգերի «փորձադաշտ», և որ դրանց օգտագործմամբ կիբեռհարձակումները կարող են րոպեների ընթացքում ոչնչացնել կարևորագույն ենթակառուցվածքները։
