Լեհաստանը, Լատվիան և Լիտվան չեն ընդունել Բելառուսի հրավերը՝ դիտարկելու «Զապադ-2025» զորավարժությունները, հայտարարել է Բելառուսի Անվտանգության խորհրդի պետական քարտուղար Ալեքսանդր Վոլֆովիչը։
«Ցավոք, մեր հրավերը՝ դիտարկելու զորավարժությունների ընթացքը, չընդունվեց ո՛չ լեհական, ո՛չ լիտվական, ո՛չ էլ լատվիական կողմից», - նրա խոսքերն է մեջբերում Բելառուսի պաշտպանության նախարարության մամուլի ծառայությունը։
Վոլֆովիչը ընդգծել է, որ զորավարժությունները կրում են զուտ պաշտպանական բնույթ։ «Զորավարժությունների նպատակներն են, նախևառաջ, մշակել Միութենական պետության ռազմական անվտանգության ապահովման հետ կապված հարցեր։ Զորավարժությունները որևէ սպառնալիք չեն ներկայացնում մեր արևմտյան հարևանների և արևմտյան գործընկերների համար», - ասել է նա։
Վոլֆովիչը բացատրել է, որ «այսօր Լեհաստանի ղեկավարությունը, Բալթյան երկրների ղեկավարությունը լավ գիտակցում են և գիտեն, որ սա զորավարժություն է, և որ Բելառուսի Հանրապետության տարածքում կատարվող ամեն ինչ իրենց համար որևէ սպառնալիք չի ներկայացնում»։
