Իսրայելը դեռևս չի արձագանքել միջնորդների առաջարկին՝ Գազայի հատվածում հրադադար հաստատելու վերաբերյալ: Ինչպես նշել է Կատարի վարչապետի խորհրդական, արտաքին գործերի նախարարության պաշտոնական խոսնակ Մաջիդ բին Մոհամմեդ ալ-Անսարին, իսրայելական կողմի գործողությունները պաղեստինյան անկլավում միայն հանգեցնում են իրավիճակի սրման:
«Իսրայելը դեռևս չի արձագանքել Գազայի հատվածում հրադադարի առաջարկին», - ասել է նա Կատարի արտաքին գործերի նախարարությունում կայացած ճեպազրույցի ժամանակ։
«Մենք Իսրայելից ոչինչ չենք տեսնում, բացի սրացումից, որը արտահայտվում է Գազա քաղաքը գրավելու մտադրությամբ», - հավելել է ալ-Անսարին։
Կատարի արտաքին գործերի նախարարության խոսնակը հայտարարել է, որ միջնորդները համագործակցում են պաղեստինյան «Համաս» շարժման և Իսրայելի հետ՝ հակամարտությունը դադարեցնելու համար, սակայն մինչ այժմ դիվանագիտական գործընթացում «ոչ մի նոր բան» չկա։ Նա կոչ է արել միջազգային հանրությանը միասնական դիրքորոշում ընդունել՝ Գազայում Իսրայելի գործողությունը դադարեցնելու համար։
