Օգոստոսի 28-ին զանգվածային լրատվության միջոցներով տարածվել է «Օմբուդսմենի աշխատակազմին դուրս են հանում Պուշկինի 56 հասցեից»` անհասկանալի և իրականությանը չհամապատասխանող վերտառությամբ հրապարակում:
«Մարդու իրավունքների պաշտպանի հաստատության տեղակայման վայրի վերաբերյալ հանրության շրջանում թյուրընկալումներից խուսափելու նպատակով հարկ ենք համարում նշել, որ ՀՀ մարդու իրավունքների պաշտպանի աշխատակազմը շարունակում է լիարժեքորեն իրականացնել իր գործունեությունը Երևանի Պուշկինի 56Ա հասցեում։
Միևնույն ժամանակ հիշեցնենք, որ դեռևս 2024 թվականի նոյեմբերի 15-ին Կառավարությունն ընդունել է «Անշարժ գույք հետ վերցնելու և ամրացնելու մասին» որոշում, որով նախատեսվում է Երևանի Մոսկովյան փողոց թիվ 5 հասցեում գտնվող անշարժ գույքն ամրացնել ՀՀ մարդու իրավունքների պաշտպանի աշխատակազմին։ Այս մասին տեղեկատվությունը հրապարակված է Պաշտպանի պաշտոնական կայքում:
Կառավարության նշված որոշումը շատ կարևոր և առաջին քայլն է լուծելու տասնամյակից ավելի պատմություն ունեցող` ՄԻՊ բնականոն գործունեության համար անհրաժեշտ շենքային պայմանների ապահովման խնդիրը, որն անընդհատ բարձրացվել է Մարդու իրավունքների պաշտպանների կողմից։ Այս համատեքստում Մարդու իրավունքների պաշտպանը կարևորում է նաև, որպեսզի հատկացվող շենքի շահագործման նախապատրաստական գործընթացը, այդ թվում` վերանորոգումը, իրականացվի հնարավորինս սեղմ ժամկետներում:
Մարդու իրավունքների պաշտպանի և ՄԻՊ հաստատության գործունեության վերաբերյալ ճշգրիտ տեղեկատվություն ստանալու համար հետևեք Պաշտպանի պաշտոնական կայքին՝ www.ombuds.am-ին»,- հայտնում է ՄԻՊ-ը:
