Ադրբեջանն Ուկրաինա է ուղարկել էլեկտրասարքավորումների հերթական խմբաքանակը՝ որպես մարդասիրական օգնություն։ Այս մասին հայտնել է հանրապետության էներգետիկայի նախարարության մամուլի ծառայությունը։
Օգոստոսի 11-ին Ադրբեջանի նախագահ Իլհամ Ալիևը հրամանագիր է ստորագրել՝ Ուկրաինային մարդասիրական օգնություն ցուցաբերելու համար երկրի էներգետիկայի նախարարությանը 2 միլիոն դոլար հատկացնելու մասին: Միջոցները նախատեսված էին Ադրբեջանում արտադրված էլեկտրական սարքավորումների գնման և առաքման համար:
Էներգետիկայի նախարարության տվյալներով՝ մարդասիրական օգնության բեռը ներառում է մոտ 90,000 մետր էլեկտրական մալուխներ և լարեր, ինչպես նաև 25 գեներատոր և 7 տրանսֆորմատոր։ «Սարքավորումներն ուղարկվել են Ուկրաինայի պատերազմից տուժած շրջաններին էլեկտրաէներգիայի կայուն մատակարարման վերականգնմանը աջակցելու համար», - ասվում է հայտարարության մեջ։
Ինչպես նշվում է Էներգետիկայի նախարարության տեղեկատվության մեջ, Ադրբեջանի կողմից Ուկրաինային տրամադրված մարդասիրական օգնության ընդհանուր արժեքը մինչ օրս գերազանցել է 44 միլիոն դոլարը։
