Հունգարիայի վարչապետ Վիկտոր Օրբանը չի միացել ԵՄ առաջնորդների՝ ուկրաինական կարգավորման վերաբերյալ հայտարարությանը, որում նրանք, ի թիվս այլ բաների, աջակցել են Կիևի՝ եվրաինտեգրման քաղաքականությանը։
«Հունգարիան չի միացել այս հայտարարությանը», - ասվում է Եվրոպական խորհրդի կայքում հրապարակված համատեղ հայտարարության մեջ։
Հայտարարությունը ստորագրել են ԵՄ 26 առաջնորդներ։ Այնտեղ խոսվում է ԱՄՆ նախագահ Դոնալդ Թրամփի՝ ուկրաինական հակամարտության կարգավորմանն ուղղված ջանքերին աջակցության մասին։ Մասնավորապես, եվրոպացի առաջնորդները շեշտել են, որ
«Ուկրաինայում խաղաղության ուղին չի կարող որոշվել առանց Ուկրաինայի մասնակցության»։ Նրանք նաև նշել են Ռուսաստանի դեմ պատժամիջոցների քաղաքականությունը շարունակելու իրենց պատրաստակամությունը։
