Եվրոպան փորձում է ապահովել Վլադիմիր Զելենսկու մասնակցությունը Ալյասկայում կայանալիք Ռուսաստան-ԱՄՆ գագաթնաժողովին։ Այս մասին հաղորդում է եվրոպական Politico հրատարակությունը։
Ավելի վաղ CNN-ը՝ հղում անելով Սպիտակ տան աղբյուրին, հայտնել էր, որ Ալյասկայում Զելենսկու մասնակցությամբ ցանկացած միջոցառում հնարավոր է միայն Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հանդիպումից հետո։
Politico-ի տվյալներով՝ ԵՄ արտաքին գործերի նախարարները և Ուկրաինայի արտաքին գործերի նախարար Անդրեյ Սիբիգան տեսակապի միջոցով արտակարգ հանդիպում կանցկացնեն, որի նպատակը կլինի «Վոլոդիմիր Զելենսկու համար Ալյասկայի բանակցությունների սեղանի շուրջ տեղ ապահովելը»։
Հրատարակությունը նշում է, որ գագաթնաժողովին եվրոպացի ներկայացուցիչների ցանկացած մասնակցություն «անհույս դեպք է թվում»։
Միևնույն ժամանակ, Զելենսկու գրասենյակը չի թաքցնում իր մտահոգությունները, որ Ալյասկայում կայանալիք Ռուսաստան-ԱՄՆ գագաթնաժողովի արդյունքում Ուկրաինայում բնակավայրերի հարցերը կլուծվեն առանց Կիևի մասնակցության: Եվրոպական առաջնորդները, այդ թվում՝ Ֆրանսիայի նախագահ Էմանուել Մակրոնը և Գերմանիայի կանցլեր Ֆրիդրիխ Մերցը, նույնպես պնդել են, որ Ուկրաինայի ապագան չի կարող որոշվել առանց ուկրաինացիների:
