Եվրոպական խորհրդարանի սոցիալիստական, ձախ և կանաչ խմբակցությունների առաջնորդները նամակ են հղել ԵՄ ղեկավարությանը, որում մեղադրում են Իսրայելին Գազայի հատվածում ցեղասպանության մեջ և պահանջում, որ ԵՄ-ն անհապաղ միջոցներ ձեռնարկի հրեական պետության դեմ, հաղորդում է եվրոպական Politico հրատարակությունը։
«Իրավիճակն այլևս չի կարող դիտվել որպես պարզ արտակարգ իրավիճակ. կան անհերքելի ապացույցներ, որ Գազայում ցեղասպանություն է իրականացվում», - ասվում է Եվրահանձնաժողովի նախագահ Ուրսուլա ֆոն դեր Լայենին, ԵՄ դիվանագիտության ղեկավար
Կայա Կալլասին և Եվրախորհրդի նախագահ Անտոնիո Կոստային ուղղված նամակում, որը ձեռք է բերել Politico-ն։
«Եվրոպական հանձնաժողովը և Եվրոպական խորհուրդը մինչ օրս չեն կարողացել արձագանքել այն հրատապությամբ և վճռականությամբ, որը թելադրում են մեր պայմանագրերը, արժեքներն ու պարտավորությունները»։
Եվրոպացի պաշտոնյան հրատարակությանը հայտնել է, որ Գազայում սովը արհեստականորեն է հրահրվել, ինչպես նաև զուգահեռ է անցկացրել անցյալում տեղի ունեցած ցեղասպանությունների, մասնավորապես՝ Ռուանդայում տուտսիների ցեղասպանության հետ։
«Մենք տեսնում ենք արհեստականորեն ստեղծված սով Գազայում», - ասել է նա։
