Վերջին յոթ ամիսների ընթացքում Իրանից և Պակիստանից արտաքսվել է ավելի քան 1.9 միլիոն աֆղան միգրանտ, հայտարարել է ՄԱԿ-ի մարդու իրավունքների գերագույն հանձնակատար Վոլկեր Թուրքը։
Հանձնակատարի տվյալներով՝ Իրանից արտաքսվել է ավելի քան 1.5 միլիոն մարդ, իսկ Պակիստանից՝ ավելի քան 300,000 մարդ։
Թուրքը զգուշացրել է, որ արտաքսվողներից շատերը բախվում են «վատ վերաբերմունքի, խոշտանգումների կամ կամայական կալանքի լուրջ ռիսկի Աֆղանստանում և չեն կարող բռնի արտաքսվել»։
Գերագույն հանձնակատարը կոչ է արել անհապաղ դադարեցնել տեղահանությունները՝ ընդգծելով, որ «վերադարձը պետք է լինի կամավոր, անվտանգ, արժանապատիվ և համապատասխանի միջազգային իրավունքին», - շաբաթ օրը հաղորդել է աֆղանական Khaama press լրատվական պորտալը։
«Աֆղանստանը լուրջ մարդասիրական և մարդու իրավունքների ճգնաժամ է ապրում։ Վերադարձողները, թե՛ հարկադիր, թե՛ կամավոր, բախվում են խտրականության, բռնության, տնտեսական դժվարությունների և զբաղվածության հնարավորությունների բացակայության», - մեջբերում է հրատարակությունը դիվանագետի խոսքերը։
