ԱՄՆ նախագահ Դոնալդ Թրամփը կոչ է արել անհապաղ դադարեցնել Բրազիլիայի նախկին նախագահ (2019-2022) Ժաիր Բոլսոնարոյի դեմ դատավարությունը։ Այս մասին ասվում է ամերիկացի առաջնորդի՝ հարավամերիկյան երկրի նախկին ղեկավարին ուղղված նամակում։
«Ես տեսել եմ, թե ինչ սարսափելի վերաբերմունքի եք արժանացել այն համակարգի կողմից, որը շրջվել է ձեր դեմ։ Այս դատական հայցը պետք է անհապաղ մերժվի։ Ես անկեղծորեն հույս ունեմ, որ Բրազիլիայի կառավարությունը կփոխի իր կուրսը, կդադարի հարձակվել քաղաքական հակառակորդների վրա և կվերջ դնի այս ծիծաղելի գրաքննության ռեժիմին։
Ես ուշադիր կհետևեմ իրավիճակին», – գրել է Թրամփը իր «Truth Social» էջում հրապարակված նամակում։
Ավելի վաղ Սպիտակ տան ղեկավարը քննադատել էր Բրազիլիայի իշխանություններին Բոլսոնարոյի դեմ ձեռնարկված գործողությունների համար, որը հետաքննվում է պետական հեղաշրջման փորձի համար, որի նպատակն էր խափանել պետության ներկայիս ղեկավար Լուիս Ինասիու Լուլա դա Սիլվայի՝ 2022 թվականին իշխանության գալը։
