Գազայի հատվածում մեկ օրում ավելի քան 90 պաղեստինցի է մահացել Իսրայելի ռազմական գործողությունների և մարդասիրական օգնության բաշխման կետում առաջացած հրմշտոցի հետևանքով, հաղորդում է կատարական «Ալ Ջազիրա» հեռուստաալիքը՝ հղում անելով բժշկական աղբյուրներին։
Նրանց տվյալներով՝ վերջին 24 ժամվա ընթացքում Գազայում զոհվել է առնվազն 93 պաղեստինցի, այդ թվում՝ 30 զոհ՝ հրմշտոցների և մարդասիրական օգնության բաշխման կետերի վրա հարձակումների հետևանքով։
Իսրայելի շարունակական հարձակումների ֆոնին զոհերի թիվը շարունակում է աճել։ Բանակը շարունակել է ռմբակոծել Գազան ամբողջ գիշեր, վերջին ժամերին գրանցվել է երկու մահացու հարձակում, հաղորդում է «Ալ Ջազիրան»։
Հաղորդվում է, որ Գազայի կենտրոնական հատվածում գտնվող փախստականների ճամբարի դպրոցի վրա Իսրայելի օդային հարվածի հետևանքով զոհվել է չորս մարդ, իսկ անկլավի հյուսիսային մասում գտնվող Գազա քաղաքի բնակելի շենքի վրա ավիահարվածի հետևանքով՝ երեք մարդ։
