Իսրայելի պաշտոնյաները Գազայի հատվածում հրադադարի շուրջ բանակցությունների ընթացքում միջնորդներ Եգիպտոսին և Կատարին հայտարարել են, որ մտադիր են ստեղծել «մարդասիրական քաղաք»՝ անկլավի բնակիչներին հարկադիր տեղավորելու և ամբողջ սահմանի երկայնքով 2 կմ խորությամբ անվտանգության գոտի ստեղծելու համար, հաղորդում է էմիրաթական The National թերթը՝ հղում անելով աղբյուրներին։
Ավելի վաղ Իսրայելի պաշտպանության նախարար Իսրայել Կացը հայտարարել էր, որ հանձնարարել է իր գերատեսչությանը ուսումնասիրել հարավային Գազայում՝ մարտերի ընթացքում ավերված Ռաֆահի տեղում «մարդասիրական քաղաք» ստեղծելու հնարավորությունը, որտեղ հնարավոր է տեղավորվի 600,000 մարդ:
Իսրայելցիների ծրագրերի համաձայն՝ պաղեստինցիները չեն կարողանա լքել այս «քաղաքի» պարագիծը: Իսրայելի վարչապետ Բենիամին Նեթանյահուն հայտարարել է, որ սա իր ծրագիրը չէ, այլ ավելի աջակողմյան կոալիցիոն գործընկերների նախաձեռնություն, և այս հարցի վերաբերյալ որոշում չկա:
