Մոսկվան հույս ունի, որ Թեհրանն ու Վաշինգտոնը Օմանում բանակցությունների ընթացքում կկարողանան կարգավորել իրանական միջուկային ծրագրի շուրջ ստեղծված ճգնաժամը։ Այս մասին հայտարարել է ՌԴ փոխարտգործնախարար Անդրեյ Ռուդենկոն։
«Մոսկվայի համար կարևոր է, որ այդ շփումների արդյունքները դրական լինեն, քանի որ նման արդյունքը կնպաստի տարածաշրջանում կայունությանը:
Հուսով ենք, որ բանակցությունների մասնակիցները կհասնեն ընդունելի պայմանավորվածությունների», - ISNA գործակալությանը ասել է ՌԴ փոխարտգործնախարարը:
Մայիսի 11-ին Իրանը և ԱՄՆ-ը Օմանի միջնորդությամբ անցկացրել են Թեհրանի միջուկային ծրագրի շուրջ բանակցությունների չորրորդ փուլը: Խորհրդակցություններին իրանական պատվիրակությունը գլխավորում էր արտգործնախարար Աբբաս Արաղչին, իսկ ամերիկյան պատվիրակությունը՝ նախագահի հատուկ բանագնաց Սթիվեն Ուիթքոֆը։
Ինչպես բանակցություններից հետո նշել է Իրանի ԱԳՆ ղեկավարը, այս փուլն ավելի լուրջ ու անկեղծ էր, քան նախորդները, և կողմերի դիրքորոշումներն ավելի սերտացան։ Մայիսի 16-ին ԱՄՆ նախագահ Դոնալդ Թրամփը հայտարարել էր, որ Վաշինգտոնը Թեհրանին գրավոր առաջարկ է ուղարկել իրավիճակը կարգավորելու համար։
