Ստամբուլում Ռուսաստանի և Ուկրաինայի բանակցությունները կարևոր են երկրների ղեկավարների հնարավոր հանդիպման նախապատրաստման համար, հայտարարել է Թուրքիայի արտգործնախարար Հաքան Ֆիդանը։
«Այս հանդիպումը կորոշի երկրների ղեկավարների հետագա հանդիպումը»,- ասել է նա Մոսկվայի և Կիևի պատվիրակությունների հանդիպման բացման խոսքում։
Ռուսաստանի նախագահ Վլադիմիր Պուտինը ավելի վաղ առաջարկել էր Ուկրաինային վերսկսել ուղիղ բանակցություններն առանց նախապայմանների Ստամբուլում մայիսի 15-ին։
Երկրի ղեկավարը չի բացառել, որ համապատասխան բանակցությունների ընթացքում կողմերը կարող են համաձայնության գալ հրադադարի շուրջ։ Ինչպես հայտարարել է ՌԴ նախագահի մամուլի քարտուղար Դմիտրի Պեսկովը, Ռուսաստանը վճռական է լրջորեն փնտրել երկարաժամկետ խաղաղ կարգավորման հասնելու ուղիներ։
Նրա խոսքով`Ուկրաինայի հետ առաջարկվող բանակցությունների նպատակներն են վերացնել հակամարտության բուն պատճառները եւ ապահովել Ռուսաստանի շահերը։
